Аввалроқ Сурхондарё вилояти ҳокими Тўра Боболовнинг коронавирусга чалиниб, вафот этгани ҳақида хабарлар тарқалган эди, вилоят ҳокимлиги мазкур хабарларни рад этганди.
«Диёр 24»нинг ёзишича, мазкур ҳолат вилоят прокуратураси томонидан тезкорлик билан назоратга олиниб, ҳолат бўйича терговга қадар текширув ҳаракатлари ўтказилиши таъминланди. Текшириш натижасида ушбу хабарни тарқатган шахс фуқаро Д.О. эканлиги аниқланган.
Маълум бўлишича, «Ҳақиқатчи блогерлар» аккаунтини юритувчи Д.О. 1971 йилда Сариосиё туманида туғилган. У Самарқанд Тиббиёт институтини тамомлаган бўлиб, Сариосиё тумани Тиббиёт бирлашмасига қарашли тез тиббий ёрдам бўлимида шифокор-кардиолог бўлиб ишлайди. Шу билан бирга, Сариосиё тумани Шарғун шаҳрида жойлашган поликлиникада ҳам даволовчи шифокор сифатида фаолият юритади.
Текширишда фуқаро Д.О. ушбу хабарни вилоят Санитария-эпидемиологик осойишталик маркази ходимидан олганлигини маълум қилиб, ушбу аёлнинг исмини айтмаган. Бегона аёл ўз телефон рақамидан 24 июль куни соат 08:00 ларда қўнғироқ қилиб, аввалига муаммолари ҳақида айтган. Кейин эса гўё Сурхондарё вилояти ҳокими вафот этганлиги ҳақида билдирган.
Шу пайтнинг ўзида Д.О. ўзининг Redmi Note 9 русумли уяли телефонида ушбу ёлғон (расмий тасдиқланмаган) хабар тўғрисида пост тайёрлаб, Facebook ҳамда Telegram’даги саҳифаларига жойлаштирган.
Текширувда тўпланган ҳужжатлар 24 июлда Маъмурий жавобгарлик тўғрисидаги кодекснинг 40-моддаси (Туҳмат) ва 46-моддаси (Фуқарога маънавий ёки моддий зарар етказиши мумкин бўлган маълумотларни ошкор этиш) билан Узун тумани маъмурий судига юборилган ва суднинг шу кундаги қарори билан ҳуқуқбузар Д.О.га нисбатан базавий ҳисоблаш миқдорининг 10 баравари миқдорида жарима жазоси тайинланган. Иш бўйича далил тариқасида олинган Redmi Note 9 русумли уяли телефони маъмурий ҳуқуқбузарлик содир этиш қуроли сифатида давлат фойдасига мусодара қилинди.
Текширувлар давом эттирилиб, Д.О.га қўнғироқ қилиб, ёлғон маълумот тақдим этган номаълум аёл Термиз шаҳар Санитария-эпидемиологик осойишталик маркази ходими Г.Р. эканлиги аниқланган. Г.Р. ўз тушунтиришида Д.О.га мазкур ёлғон хабарни айтганлигини тан олган.
Мазкур ҳолат юзасидан Г.Р.га нисбатан Маъмурий жавобгарлик тўғрисидаги кодекснинг 40-моддаси (Туҳмат) билан маъмурий иш қўзғатилиб, тегишли суд органига юборилган.
Эслатиб ўтамиз, Сурхондарё вилояти ҳокими Тўра Боболов коронавирусга чалинган бўлиши мумкинлиги ҳақидаги маълумот «Дарё»га дастлаб 15 июль куни тушганди. Вилоятдаги манбалар Термизда одатда вилоят ҳокими томонидан ўтказадиган йиғилиш ва тадбирлар унинг ўринбосари томонидан олиб борилаётганини маълум қилган. ССВ унинг касалликка чалингани ҳақида 18 июль куни хабар берган.
Орадан бир неча кун ўтиб, Тўра Боболовнинг коронавирусдан вафот этганлиги тўғрисида ижтимоий тармоқларда хабарлар тарқалди. Сурхондарё вилояти ҳокимлиги бу хабарни рад этиб, «Воҳадошларимиздан айрим фуқаролар томонидан коронавирус ваҳимаси фонида тарқатилаётган бундай миш-мишлар, ёлғон ахборотларга ишонмасликларингизни сўраймиз», дея баёнот билан чиқди, бироқ кўп ўтмай ҳокимлик матбуот хизмати бу хабарни ўчириб ташлаб, ўрнига янги хабар чиқарган ва унда вилоят ҳокимининг аҳволи яхши эканлиги, яқин кунларда иш фаолиятини давом эттириши қўшимча қилинган. Тўра Боболовнинг ўзи 24 июль куни видеомурожаат қилиб, аҳволи яхши эканлигини маълум қилди.
Изоҳ (0)