Қамчиқ довонида тормози ишламай қолган юк машинаси тоғга бориб урилди. Ҳайдовчи вафот этди

24 апрель, жума куни, соат 13:30 ларда Қамчиқ довонида Shacman SX4254 юк машинаси иштирокида одам ўлими билан якунланган ЙТҲ содир бўлди. Бу ҳақда ЙҲХББ хабар берди.

Наманган вилояти Поп тумани ҳудудидан ўтувчи А-373 Тошкент—Ўш автомобиль йўлининг 251-километрида 1983 йилда туғилган А.Ю. бошқарувидаги юк машинасининг тормоз тизимида носозлик юзага келган. Ҳайдовчи бошқарувни йўқотиб, йўлнинг ўнг томон қатнов қисми четидаги «фавқулодда ҳолат учун ташкил этилган авария йўлакчаси»га чиқиб, «Тоғ шаббодаси» ошхонаси томон 180 метр масофа ҳаракатланиб, тоғга бориб урилган.

Ҳайдовчи А.Ю. оғир тан жароҳати олиб, воқеа жойида вафот этган.

ЙҲХББ томонидан эълон қилинган суратларда юк машинасининг кабинаси тоғга урилгач, деярли йўқ бўлиб кетганини кўриш мумкин.

Апрель ойининг тўртинчи ҳафтасида одам ўлими билан якунланган яна бир нечта ЙТҲ содир бўлди. 20 апрель куни Муборак туманида Spark ва «Зил» тўқнашуви оқибатида 32 ёшли Spark ҳайдовчиси, 21 апрель куни Бойсун туманида Nexia қўйларни ҳайдаб кетаётган чўпонни уриб кетиши оқибатида 28 ёшли чўпон, Чирчиқ шаҳрида Nexia-3 пиёдани уриб юбориши оқибатида 60 ёшли пиёда, Сариосиё туманида Captiva велосипедчини туртиб юбориб, сўнг деворга урилиши оқибатида 31 ёшли йўловчи, Конимех туманида Nexia-3 ағдарилиб кетиши оқибатида 24 ёшли ҳайдовчи вафот этганди.