18 март куни, жиноят ишлари бўйича Тошкент шаҳар суди судланувчи Гулнора Каримовани жиноий уюшма ташкил этиш, товламачилик, ўзлаштириш ва растрата йўли билан талон-торож қилиш, жиноий фаолиятдан олинган даромадларни легаллаштириш ва бошқа жиноятларни содир этганликда айбли деб топди. Бу ҳақда Олий суд ахборот хизмати хабар берди.

Фото: Facebook / @iman.к17

Суд ҳукми билан Гулнора Каримовага 13 йил 4 ой муддатга озодликдан маҳрум қилиш жазоси тайинланди. Жиноят қонунчилиги нормаларига мувофиқ ҳамда бир неча жиноят ва ҳукмлар мажмуи бўйича жазо тайинланганлигини инобатга олган ҳолда жазо муддатини 2015 йил 21 августдан бошлаб ҳисоблаш белгиланди.

Қолган судланувчиларга ҳам содир этилган жиноятларнинг оғирлилик ва ижтимоий хавфлилик даражаси ҳамда уларнинг жиноятлардаги иштирокидан келиб чиқиб, тегишли жазолар тайинланди.

Хусусан, суд ҳукмига кўра, Н. Содиқовга 20 йил, О. Свиридовга 17 йил 3 ой, А. Эргашевга 18 йил 1 ой, Ш. Сабировга 17 йил 1 ой озодликдан маҳрум қилиш жазоси, Г. Авакянга 3 йил синов муддати билан 5 йил 3 ой 21 кун шартли равишда озодликдан маҳрум қилиш жазоси тайинланди.

Ж. Абдурахманов ва Б. Тешабаев эса жавобгарликка тортиш муддатининг ўтиб кетганлиги муносабати билан жиноят учун жавобгарликдан озод қилинди.

Аввалроқ Ўзбекистон Биринчи Президентининг тўнғич қизи Гулнора Каримова Президент Шавкат Мирзиёевга хат билан мурожаат қилиб, жиноий ишлар билан таъқиб қилиш тўхтатилиши эвазига Швейцарияда музлатиб қўйилган 686 миллион доллар миқдоридаги маблағга даъводан воз кечишга тайёрлигини билдирган эди.

Мавзуга доир:

Эслатиб ўтамиз, Ўзбекистон Бош прокуратураси 2017 йил июлида Гулнора Каримовага 2015 йил августида беш йилга озодликни чеклаш жазоси тайинланганини маълум қилган эди. Ўша вақтда унга нисбатан бошқа жиноят иши бўйича тергов ҳаракатлари давом этаётган эди. Икки жиноят иши бўйича давлат ва фуқаролар манфаатларига етказилган зарар 3,7 триллион сўмга баҳоланган.

Гулнора Каримова 2019 йил мартидан бери Тошкент вилояти Зангиота туманида жойлашган умумий тартибдаги 21-сон колонияда сақланмоқда. Унга нисбатан яна бир неча жиноят ишлари очилган, жумладан, у талон-торож қилиш ва давлатга зарар етказишда айбланмоқда. 2019 йил охирида Бош прокуратура Гулнора Каримованинг 1,3 миллиард доллардан ортиқ миқдордаги даромадларини қайтариш масаласида АҚШ, Швейцария, Франция, Россия ва Латвия билан биргаликда иш олиб бораётганини маълум қилган эди, алоҳида мамлакатларда ушбу маблағлар бўйича ҳам жиноят ишлари очилган.