Бир неча шахслардан иборат ва олдиндан тил бириктирган жиноий гуруҳ «Стечкин» русумли, 9 мм калибрли пистолетни 1500 АҚШ долларига сотмоқчи бўлган вақтида ИИВ Жиноят қидирув бош бошқармаси ходимлари томонидан қўлга олинди. Бу ҳақда ИИВ ахборот хизмати хабар берди.

Фото: ИИВ ахборот хизмати

ИИВ Жиноят қидирув бош бошқармаси маълумотига кўра, воқеа 29 январь куни Тошкент шаҳрида содир бўлган. Ўзбекистон Республикаси ички ишлар вазирининг биринчи ўринбосари, полковник А.Тошпўлатов томонидан берилган топшириққа асосан, жиноятчилар «Стечкин» автоматик пистолетини сотмоқчи бўлганда қўлга олинган.

Мазкур ҳолат юзасидан жиноий гуруҳнинг 4 нафар аъзосига нисбатан Жиноят кодексининг 248-моддаси (Қурол, ўқ-дорилар, портловчи моддалар ёки портлатиш қурилмаларига қонунга хилоф равишда эгалик қилиш) 3-қисми билан жиноят иши қўзғатилиб, ҳозирда тергов ҳаракатлари олиб борилмоқда.

ИИВ Жиноят қидирув бош бошқармаси маълумотига кўра, 2019 йил давомида ўқотар қурол, ўқ-дорилар, портловчи моддалар ёки портлатиш қурилмалари билан қонунга хилоф равишда шуғулланувчи шахсларни аниқлаш борасида олиб борилган тезкор тадбирлар натижасида жами 118 та жиноий ҳолат аниқланган.

Фото: ИИВ ахборот хизмати

Фото: ИИВ ахборот хизмати

Фото: ИИВ ахборот хизмати

Фото: ИИВ ахборот хизмати

Қайд этилишича, 16 та жиноий ҳолат контрабанда йўли билан амалга оширилган. Аниқланган 118 та жиноий ҳолат бўйича 127 нафар (шундан 5 нафари чет эл фуқаролари) шахс жиноий жавобгарликка тортилган.

Жиноий жавобгарликка тортилган шахслардан 114 дона қурол: 2 дона пистолет, 2 дона қўлбола усулда ясалган қурол ва 110 дона ов қуроли, 1340 ўқ-дори, 1 та тротил шашка ва 2 дона граната, 46 килограммдан зиёд портловчи моддалар ҳамда 1 дона қўлбола усулда ясалган портловчи қурилма ашёвий далил тариқасида олинган.

Бундан ташқари, аҳоли ўртасида қурол, ўқ-дорилар, портловчи моддалар ёки портлатиш қурилмаларини ўз ихтиёри билан топширган шахс жиноий жавобгарликдан озод қилиниши юзасидан олиб борилган профилактик тушунтириш ишлари натижасида биргина 2019 йил давомида 114 нафар фуқародан 771 дона қурол-яроғ (шундан 8 дона пистолет, 109 дона бошқа турдаги қурол-яроғ, 654 дона ов қуроли, 3705 дона патрон, 5 дона граната, 1326 грамм портловчи моддалар) ихтиёрий равишда топширилди.

Бу шахсларга нисбатан қонунда белгиланган тартибда жиноий жавобгарликдан озод этиш тўғрисида қарорлар қабул қилинган.