Олий ва ўрта махсус таълим вазири Иномжон Мажидов бошчилигида республикадаги барча олий таълим муассасалари ректорлари, хорижий олий таълим муассасаси филиаллари директорлари, Касбий таълимни ривожлантириш ва мувофиқлаштириш ҳудудий бошқармалари бошлиқларидан иборат делегация Тошкент шаҳрида ўз фаолиятини бошлаган иккита ихтисослаштирилган мактаб фаолияти билан танишди.
Олий таълим тизими делегацияси Абдулла Қодирий номидаги ижод мактаби ва музейни бориб кўрди.
Ижод мактабида яратилган шарт-шароит ва ўқув жараёнлари билан танишиш асносида вазир олий таълим муассасалари ижод мактаблари билан яқиндан ҳамкорлик қилишга, ёш иқтидор эгаларини рағбатлантириш доимо тайёрлигини маълум қилди.
Делегациянинг Абдулла Қодирий номидаги ижод мактабига ташрифи давомида муассаса жамоасига Самарқанд давлат чет тиллари институти ректори Илҳомжон Тўхтасинов томонидан адиб таваллудининг 125 йиллигига бағишлаб инглиз тилига таржима қилинган «Меҳробдан чаён» ва «Ўткан кунлар» романлари совға қилинди.
Шундан сўнг гуруҳ аъзолари Тошкент шаҳридаги яна бир янги таълим маскани — Муҳаммад ал-Хоразмий номидаги ахборот-коммуникация технологиялари йўналишига оид фанларни чуқурлаштириб ўқитишга ихтисослаштирилган мактаб фаолияти билан ҳам танишди.
Делегация бу ерда ўқувчи иқтидорини намоён қилиш учун яратилган бутун бир мажмуа: замонавий жиҳозланган ўқув хоналари, илғор педтехнология ва инновацион методлардан фойдаланган ҳолда дарсларнинг олиб борилиши, дарсдан ташқари пайтда бола иқтидорини ривожлантириш учун йўлга қўйилган тизим, ўқувчилар турар жойларида кенг имкониятлар яратилганлигига гувоҳ бўлди.
Ташриф давомида Иномжон Мажидов мактабда ўқувчи вақтини тўғри тақсимлаш ва дарс жараёнларини самарали олиб бориш, қолаверса, ўқувчининг иқтидорини рағбатлантириш мақсадида улар билан индивидуал ишлашни йўлга қўйишда олий таълим муассасалари профессор-ўқитувчилари билан яқиндан ҳамкорлик қилишни таклиф қилди.
Изоҳ (0)