Инновацион ривожланиш вазирлиги қошидаги Илғор технологиялар марказида Марказий Осиёда илк бора GIST (илм-фан ва технологиялар орқали глобал инновациялар) стартап тренинги ўтказилди. Бу ҳақда «Дарё»га вазирлик матбуот хизмати маълум қилди.
Машғулотлар АҚШ элчихонаси ва Инновацион ривожланиш вазирлиги ҳамкорлигида ташкил этилди. Глобал тадбиркорлик ҳафталиги доирасида ўтказилган тренингда Ўзбекистон, Қозоғистон, Қирғизистон ва Тожикистон жамоалари иштирок этди.
АҚШдан келган 7 нафар тренер, ментор ва спикерлар тадбиркорлик, илмий-техникавий ишланмаларни тижоратлаштириш, ғоялар ва технологияларни монетиризациялаш бўйича маърузалар ўқиди, амалий машғулотлар орқали тренинг қатнашчиларига кучларини синашга имкон берди.
Тренингда ёшлар нафақат билим олиш, балки билимларини тажрибада синаб кўришга ҳам муваффақ бўлди. Жамоаларга потенциал харидорларни сўровдан ўтказиш, бўлажак мижозлар, ҳамкорлар, ҳатто рақобатчилари билан мулоқот қилиш каби вазифалар берилди. Янги технологиялар асосланган тадбиркорлик фаолиятини юритиш, илмий-тадқиқот натижаларини тижоратлаштиришга бел боғлаган йигит-қизлар бизнес-моделлар тузиш, ўз стартаплари учун бозорни ўрганиш, маҳсулот нархини чиқариш, мижозларни жалб этиш ҳамда бизнесни кенгайтириш усулларини татбиқ этиш кўникмаларини эгаллади.
Тўрт кун давом этган мазкур тадбир аввало ёшларнинг новаторлик имкониятларини кенгайтириш, ҳудудда янги стартапларни яратиш, тадбиркорлик экотизимини мустаҳкамлашга қаратилди.
Финалга чиққан етти жамоа ичидан учта жамоа танлаб олиниб, улар 1000 дан 3000 АҚШ долларигача бўлган пул мукофотлари билан тақдирланди.
Биринчи ўринни ўзбекистонлик ёш кимёгарлар Мардонали Мирзалиев ва Шерозбек Долимов тақдим этган «Ўзбекистонда пектин ишлаб чиқариш» лойиҳаси қўлга киритди.
— Пектин озиқ-овқат саноатида кенг қўлланиладиган табиий қўшимча бўлиб, ундан қандолатчилик, фармакология соҳаларида фойдаланилади. Пектин мевалар, жумладан, Ўзбекистонда жуда кўп етиштириладиган олмадан олинади. Аммо шу пайтгача Ўзбекистонга бу маҳсулот хорижий давлатлардан олиб келинмоқда. Бу аслида жуда таажжубли ҳол, лекин бозорни ўрганарканмиз, бирорта маҳаллий пектин ишлаб чиқарувчини тополмадик. Шу боис ҳам биз бу маҳсулотни ўзимизда ишлаб чиқарилишини йўлга қўймоқчимиз, — дейди Шерзодбек Долимов.
Иккинчи ўрин тожикистонлик ёш тадқиқотчиларнинг Easy Silk Road деб номланган стартапига берилди. Бу сайёҳлар учун илова бўлиб, у ерда сайёҳлик маршрутлари, жумладан, хавфли ҳудудлар ҳақида муҳим маълумотлар берилади.
Учинчи ўринни эса ўзбекистонлик ёшлар томонидан яратилган чакана савдонинг харажатларини камайтиришга ёрдам берадиган Fastago лойиҳаси ҳамда чиқиндиларни камайиши ва уларни қайта ишлашга қаратилган қирғизистонлик тадбиркор-ихтирочилар яратган лойиҳа эгаллади.
Изоҳ (0)