Қорақалпоғистон Республикаси Туризмни ривожлантириш давлат қўмитаси ва Қорақалпоғистон Республикаси ахборот агентлиги ҳамкорлигида 22 март куни ички туризмни ривожлантириш мақсадида 22 нафар журналист, блогер ва фотомухбир Устюрт текислигига саёҳат уюштирди. «KRuz.uz» журналисти ушбу саёҳат борасидаги ўз таассуротлари билан бўлишди.
Биз даставвал туз конига ташриф буюрдик. Туз тоғи ҳақида кўп эшитгандиг-у, лекин ҳеч ўз кўзимиз билан кўрмаган эдик. Умуман олганда бу борада ҳатто тасаввур ҳам йўқ эди. Хуллас, бу ердаги манзарани таърифлаш учун сўз камлик қилади. Яхшиси бу жойларни бориб томоша қилган маъқул.
Борсакелмас туз кони биносида тушлик қилиб, яна йўлга чиқдик.
Кейинги манзил — Устюрт текислиги бўлди. Биз бу жойда каньонларни томоша қилдик. Шундан сўнг Устюрт газ-кимё комплекси қошида ташкил этилган Елабад ва Қирққиз посёлкаларига бордик. Очиғи бу ердаги шароитларни кўриб ҳавасим келди. Ҳатто, Нукусда ҳам бундай зўр шароит йўқ, десам асло муболаға бўлмайди.
Сафаримиз сўнгида Қўнғирот сода заводига кирдик. 2006 йилда очилган завод учун 2 йил олдин ўзининг 10 йиллик юбилейига бағишлаб, завод ҳақида 100 та китоб ва 100 та кўкрак нишони чиқарилган экан.
Борсакелмасга сафаримиз 14 соат давом этди. 21:00 да яна Нукус шаҳрига қайтиб келдик. «Борсакелмасга борганлар келмайди»,— деган афсоналар қанчалик ҳақиқат эканини билмадим-у, лекин биз Барсага бориб қайтиб келдик.
Изоҳ (0)