Санкт-Петербургнинг Калинин туман суди «Перекрёсток» супермаркетида теракт уюштиришда айбланган Дмитрий Лукяненкони икки ойга ҳибсга олди. Бу ҳақда «Интерфакс» хабар бермоқда.
«Айбланувчи қамоққа олинишига эътироз билдирмади, қилмишларини тан олди. Руҳий касалликлар диспансерига ҳисобда турмайди. Ҳибсга олинишига монелик қиладиган касалликларга чалинмаган», — дейилади суд хабарида.
Суд йиғилиши ёпиқ тартибда, ОАВ иштирокисиз ўтди.
Кейинчалик Лукяненко ҳибсга олинишига шикоят билдириш ниятида эканлиги маълум бўлди.
Эслатиб ўтамиз, «Перекрёсток» супермаркетида 27 декабрь куни юз берган портлашда 18 киши жароҳат олди, 8 киши касалхонада қолмоқда.