Нидерландиянинг Хертогенбос шаҳрида архитектор Дрис Крейкампнинг лойиҳаси асосида қурилган уйлар даҳаси жойлашган. Тажриба уйлар лойиҳаси 1960 йилларнинг охирида маъқулланган бўлса ҳам, қурилиш ишлари 1984 йилда якунланган. Bolwoningen («Шар уйлар») ноодатий дизайни билан сайёҳларни ўзига жалб қилади. TJournal ана шу уйларнинг суратларини тақдим этди.
Цилиндр асосларга ўрнатилган бу уйлар фильмларда акс этган ўзга сайёра уйлари ёки ғаройиб ёмғир қўзиқоринларига ўхшайди. Ҳаммаси бўлиб 50 та уй қурилган. Ҳар бирининг диаметри 5,5 метрни ташкил қилади. Иншоотлар бетондан ва ойнали толадан қурилган. Уйларнинг 11 тадан деразаси бўлиб, сунъий кўлнинг бўйида жойлашган.
Ҳар бир уйда кириш қисми, ошхона, ётоқхона, меҳмонхона, ювиниш хонаси ва ҳожатхзона бор. Бу уйларнинг ҳар қайсиси бир ёки икки киши учун мўлжалланган. Бироқ уларнинг архитектори кўплаб танқидларга учраган. Уйлар баъзи журналлар томонидан энг хунук уйлар рўйхатига киритилган. Шунинг учун архитектор бошқа бундай уйлар учун буюртма олмаган. Шунга қарамасдан, айни вақтда уйлар якка ҳаёт кечирувчилар ва талабалар орасида оммабопликка эришган.