Европа Чемпионлар лигасининг «Реал» ҳамда «Ювентус» клублари ўртасидаги финал учрашувини Турин шаҳрида томоша қилган мухлисларнинг 1000 дан зиёди саросима оқибатида келиб чиққан тартибсизликдан жабр кўрди.
«Sports.ru» нашрининг хабар беришича, «Реал» учинчи голни урган бир пайтда петардалар товуши эшитилган. Айрим манбалар эса улкан темир дарвозанинг қулаши натижасида бу товуш келиб чиққани ҳақида маълумот берган.
Оқибатда футбол мухлислари ўртасида саросима бошлаган ва улар турли бурчакларга қараб қоча бошлаган. Мазкур ҳолат мингдан зиёд футбол мухлисларининг жароҳат олишига сабаб бўлди. Оламон оёқлари остида қолган беш кишида жароҳат анча жиддий экани айтилган.
Яна икки киши эса танг аҳволда. Шифокорлар уларнинг ҳаётини сақлаб қолиш учун барча чорани ишга солмоқда. Энг жиддият азият чеккан бу икки кишидан бири эндигина 4 ёшга қадам қўйган болакайдир.