Ўзбекистондаги тренд: таом етказиб бериш сервисларининг авж олиши

Тошкентда таом етказиб бериш хизмати айни ривожланиш чўққисига чиққан. Ҳар ойда янгидан-янги лойиҳалар пайдо бўлиб, йўқолмоқда.

Тайёр таомларни етказиб бериш билан шуғулланадиган сервисларни санаб ўтамиз:

• eOrders — http://e-orders.uz/ — ресторандан таом етказиб берадиган лойиҳа Ўзбекистонда биринчи бўлиб ушбу йўналишни ривожлантира бошлади. Сайтдаги шахсий кабинет орқали сизга ёқиб тушган ресторан таомномасидан буюртма қилиш мумкин. Тўлов, буюртмани олгач, курьерга берилади;
• GetFood — http://getfood.uz/ — 2015 йил июнида пайдо бўлган, ресторанлар билан ишлаб, буюртмаларни сайт орқали қабул қилади. Тўлов курьерга берилади;
• Eat — http://eat.uz/ — худди шундай моделдаги сервис;
• Bringo — http://www.bringo.uz/ — 2015 йил августида очилган сервиснинг бошқа рақобатчиларидан фарқи шундаки, у иссиқ овқатни термосумкада етказади ва «таомни буюртмадан сўнг бир соат ичида етказиш»га кафолат беришга интилади. У тайёр ресторан таомидан ташқари, озиқ-овқат маҳсулотларини ҳам етказиб беради.

Умуман олганда, кўпчилик таом етказиб бериш бизнесини очишга ҳаракат қилмоқда, бироқ бу соҳанинг баъзи жиҳатлари борки, улар лойиҳани йўққа чиқариши мумкин:

• Логистика (етказиб бериш нархи, шаҳарнинг олис туманларига етказиш)ни яхшилаб ўйлаб кўриш керак;
• Тушлик вақтида ҳаммага катта-катта буюртмалар оқимлари ёпирилиб келади ва кўпчилик сервислар уларни эплай олмай қолади (курьер ёки машиналар етишмаслиги туфайли);
• Жуда катта устама нарх қўйиб бўлмайди (одамлар таом учун ресторандагидан кўра кўпроқ пул тўлашни истамайди). Устама нарх кам бўлса, сервис фойда келтирмайди;
• Ресторанлар билан келишиш қийин (уларга буюртмаларни қандай берасиз, улар билан қандай ҳисоблашасиз).

П.С. Мақолада барча етказиб бериш хизматлари санаб ўтилмади, фақат сўнгги ярим йил ичида пайдо бўлганлари тилга олинди. Бошқа лойиҳаларни билсангиз — бизга маълум қилинг, уларни ҳам кўриб чиқамиз.

Лойиҳа «Дарё» ва StartupFactory.uz томонидан ишга туширилган.