Gulnora Karimova noqonuniy o‘zlashtirgan Shveysariyadagi mablag‘lardan 95 million dollari O‘zbekistonga qaytarilgan. Bu haqda 24-aprel kuni Olmaliq shahrida o‘tkazilayotgan matbuot anjumanida iqtisodiyot va moliya vaziri o‘rinbosari Otabek Fozilkarimov ma’lum qildi, deb xabar bermoqda “Daryo” muxbiri.
Mas’ulga ko‘ra, musodara qilingan 131 million dollarni O‘zbekistonga qaytarish bo‘yicha kelishuvga erishilgan. Ayni paytgacha mamlakatga kelib tushgan 87 million dollarlik mablag‘lar sog‘liqni saqlash va ta’limga sarflanmoqda (har bir sohaga 43,5 million dollardan).
Shveysariyaning O‘zbekistondagi favqulodda va muxtor elchisi Konstantin Obolenskiyning ma’lum qilishicha, Shveysariyada musodara qilingan jami 313 million dollar O‘zbekistonga qaytariladi.
Matbuot anjumanida so‘zga chiqqan BMTning O‘zbekistondagi doimiy koordinatori Sabina Mahl Gulnora Karimova o‘g‘irlagan pullar o‘zbek xalqiga tegishli ekanligini aytdi.
“Gulnora Karimova o‘g‘irlagan pullar o‘zbek xalqiga tegishli. Shu bois musodara qilingan mablag‘lar birinchi navbatda sog‘liqni saqlash va ta’limga yo‘naltirilmoqda”, deydi u.
Iqtisodiyot va moliya vazirligi matbuot xizmati bergan ma’lumotlarga ko‘ra, Shveysariya va O‘zbekiston hukumatlari o‘rtasida birinchi transh doirasida — 131 million dollar, ikkinchi transh doirasida — 182 million dollar miqdoridagi mablag‘larni qaytarish bo‘yicha kelishuvga erishilgan. Mablag‘lar Restitutsiya shartnomasida belgilangan miqdorlarda bosqichma-bosqich transfer qilinadi.
Kuni kecha Gulnora Karimovaning qamoqdan ozod qilingani haqida xabarlar tarqalgandi. Oliy sud matbuot kotibi Aziz Abidov buni rad etdi.
Izoh (0)