Ijtimoiy tarmoqlarda Toshkent shahri, Yunusobod tumani, Sayilgoh ko‘chasida eman daraxtlari kesib olib ketilayotganligi haqida xabarlar tarqaldi. Holat yuzasidan Toshkent shahar Ekologiya boshqarmasi matbuot xizmati munosabat bildirdi.
Maʼlum qilinishicha, holat Ekologiya, atrof-muhitni muhofaza qilish va iqlim o‘zgarishi vazirligi ishchi guruhi tomonidan o‘rganilgan.
O‘rganish natijasida hududdagi 26 ta eman daraxti belgilangan tartibda boshqa hududga ko‘chirib o‘tqazilayotganligi maʼlum bo‘ldi.
“Ayni damda 14 ta eman daraxti ko‘chirib o‘tqazildi. Qolgan 12 ta daraxtni ham ko‘chirish jarayoni ketmoqda. Bunda barcha agrotexnik tadbirlar olib borilmoqda, daraxtlar yashab ketishi uchun zarur o‘g‘itlar, ozuqa moddalari bilan taʼminlanmoqda. Boshqa hududga ko‘chirilgan daraxtlar to‘liq yashab ketadi va buning uchun barcha zarur chora-tadbirlar olib boriladi”, – dedi jarayonga masʼul ”Muna Mag“ korxonasi rahbari Farrux Hakimov.
Mutaxassisning taʼkidlashicha, bu daraxtlar ko‘chirib o‘tqazilganidan keyin 3 yil davomida doimiy sug‘orish, o‘g‘itlash, ildiz tizimini oziqlantirish, hasharotlar va zararkunandalarga qarshi kurash va boshqa zaruriy ishlar amalga oshiriladi. Ko‘chirilayotgan daraxtlar Toshkent viloyatidagi bog‘ uchun mo‘ljallangan hududga o‘tqaziladi.
Izoh (0)