AQSH 8-iyul kuni Suriyaning “Hayʼat Tahrir ash-Shom” (HTSH) guruhini xorijiy terrorchilik tashkilotlari ro‘yxatidan chiqarishini ma’lum qildi. Bu haqda BBC xabar berdi.
Guruh dekabr oyida Suriyada 54 yil hukmronlik qilgan Asad rejimini ag‘darib tashlagan isyonchilarga boshchilik qilgan. Uning rahbari Ahmad Ash-Shara’a endi mamlakatning vaqtinchalik prezidenti hisoblanadi. HTSH, shuningdek, “Al-Nusra fronti” nomi bilan ham tanilgan. U 2016-yilda Ash-Shara’a aloqalarni uzgunga qadar “Al-Qoida”ning Suriyadagi filiali bo‘lgan.
So‘nggi oylarda G‘arb davlatlari og‘ir sanksiyalarga uchragan Suriya bilan munosabatlarni tiklashga intilmoqda. Iyun oyi oxirida AQSH prezidenti Donald Tramp mamlakatga qarshi sanksiyalarini rasman tugatish to‘g‘risidagi farmonni imzolagandi. Oq uy bu harakat mamlakatning “barqarorlik va tinchlik yo‘lini” qo‘llab-quvvatlash uchun mo‘ljallanganini bildirgan. Oq uy Suriya yangi hukumatining Isroil bilan aloqalarni normallashtirish va Falastin terror guruhlarini taqiqlash bo‘yicha harakatlarini kuzatishini bildirgan.
Suriya tashqi ishlar vaziri Asad ash-Shiboniyga ko‘ra, sanksiyalarning olib tashlanishi mamlakat iqtisodiyotni tiklash yo‘lidagi “to‘siqni olib tashlaydi va mamlakatni xalqaro hamjamiyat uchun ochadi”.
Dam olish kunlari Buyuk Britaniya tashqi ishlar vaziri Devid Lemmining Suriya davlatiga tashrifi bo‘lib o‘tgan. U Ash-Shara’a bilan uchrashib, uzoq muddatli tiklanishni qo‘llab-quvvatlash va suriyalik qochqinlarga yordam berish maqsadida 94,5 million funt sterling gumanitar paketni taqdim etgan. Avvalroq Buyuk Britaniya Suriya Mudofaa va Ichki ishlar vazirliklariga nisbatan sanksiyalarni bekor qilgandi.
13 yillik fuqarolar urushidan so‘ng Asad rejimi ag‘darilganda, Suriya aholisining 90 foizi qashshoqlik chegarasida qolgan edi. Ash-Shara’a o‘sha paytda “yangi Suriya”ni qurishni va’da qilgandi. Mart oyida yangi xavfsizlik kuchlari va Asad tarafdorlari o‘rtasidagi to‘qnashuvlar yuzaga kelgan. O‘shanda ozchilik bo‘lgan alaviy mazhabidan yuzlab tinch aholi halok bo‘lgandi. Aprel oyida esa qurolli guruhlar, xavfsizlik kuchlari va druz diniy ozchilik jangchilari o‘rtasida ziddiyatlar kelib chiqqan. Iyun oyiga kelib Damashqdagi cherkovga uyushtirilgan xudkushlik hujumida 25 kishi halok bo‘lgandi.
Izoh (0)