Ijtimoiy tarmoqlarda davlat xizmatchisining videoselektor payti tizzasida o‘tirgan ayolni quchoqlab olgani aks etgan surati tarqalib, muhokamalarga sabab bo‘lgandi. Kambag‘allikni qisqartirish va bandlik vaziri matbuot kotibi ushbu mansabdor ishdan olinganini bildirdi.
“Xabarlarda tilga olingan xodimlar bilan mehnat shartnomasi bekor qilingan. Vazirlik o‘z tizimida xizmat intizomi va odob-axloq qoidalari buzilishiga nisbatan mutlaqo murosasizlik prinsipiga amal qiladi”, deyiladi rasmiy xabarda.
Ijtimoiy tarmoqlarda tarqalgan xabarlarga ko‘ra, odob-axloq qoidalariga zid harakat qilgan mansabdor Kattaqo‘rg‘on shahri Kambag‘allikni qisqartirish va bandlik bo‘limi boshlig‘i lavozimida ishlab kelgan.
2025-yil aprel oyida Andijon shahar Kambag‘allikni qisqartirish va bandlik bo‘limi boshlig‘i D.U. va uning o‘rinbosari S.B. ish joyida psixotrop modda iste’mol qilgani uchun ishdan bo‘shatilgandi.
