Angliya terma jamoasi bosh murabbiyi Tomas Tuxel milliy jamoa bilan shartnomasi yakunlangach, “Nyukasl Yunayted” bosh murabbiyi lavozimiga asosiy nomzodlardan biri sifatida ko‘rilmoqda. Bu haqda TEAMtalk nashri xabar berdi.
Qayd etilishicha, Tuxelning amaldagi shartnomasi 2026-yilgi Jahon chempionati final bosqichi yakuniga qadar amal qiladi.
Manbaga ko‘ra, “Nyukasl”ning hozirgi bosh murabbiyi Eddi Hau mavsum oxirida klubni tark etishi ehtimoli yuqori. Jamoaning APL turnir jadvalida 12-o‘rinni egallab turgani muxlislar noroziligiga sabab bo‘lmoqda. Hau o‘zi ham agar klubni yangi bosqichga olib chiqa olmasligini his qilsa, lavozimidan ketishga tayyor ekanini bildirgan.
Ma’lumot uchun, 52 yoshli Tuxel “PSJ” bilan ikki marta Liga 1 chempioni bo‘lgan va “Chelsi” bosh murabbiyi sifatida Chempionlar Ligasini qo‘lga kiritgan. Shuningdek, u Dortmundning “Borussiya” klubini boshqargan hamda “Bavariya”ni 2022/2023-yilgi mavsumda Bundesliga chempioniga aylantirgan.
