Toshkentdagi ko‘p qavatli uyda yuz bergan yong‘in deyarli bir soatda o‘chirildi

Toshkent shahri Yakkasaroy tumanida 13-iyun kuni ko‘p qavatli uyning tashqi qismida yuz bergan yong‘in deyarli bir soat ichida bartaraf etildi. Bu haqda FVV xabar berdi.

Ma’lum qilinishicha, soat 10:21 da Yakkasaroy tumani Nukus ko‘chasida joylashgan ko‘p qavatli uyning fasad qismi yonayotgani haqida poytaxt Favqulodda vaziyatlar bosh boshqarmasiga xabar kelib tushgan. Qutqaruv bo‘linmalari hodisa joyiga ikki daqiqadan so‘ng soat 10:23 da yetib borgan.

Yong‘in boshlangan zahoti qutqaruvchilar tomonidan uyda yashovchi barcha fuqarolar xavfsiz hududga evakuatsiya qilingan. FVV ma’lumotiga ko‘ra, hodisa oqibatida tan jarohati olganlar qayd etilmagan.

Yong‘in soat 11:00 da qurshab olinib, soat 11:10 da to‘liq o‘chirilgan. Vazirlik hodisa yuzasidan vaziyat to‘liq nazoratga olinganini bildirdi. Hozirda yong‘in sabablari va yetkazilgan zarar miqdori aniqlanmoqda.

1-iyun kuni Toshkent shahri Olmazor tumanida joylashgan podstansiyada transformator yonib ketgani haqida xabar berilgandi. Hodisa oqibatida tumanning ayrim hududlarida elektr ta’minoti vaqtincha uzilgan.