Madridning “Real” klubi sobiq bosh murabbiyi Zinedin Zidan Fransiya terma jamoasida birga ishlaydigan murabbiylar shtabi tarkibini shakllantirgan. Bu haqda taniqli jurnalist va insayder Fabritsio Romano X ijtimoiy tarmog‘idagi sahifasida ma’lum qildi.
Avvalroq Zidan Fransiya futbol federatsiyasi bilan hamkorlik bo‘yicha kelishuvga erishgan edi. Tomonlar mundialdan so‘ng barcha zarur hujjatlarni imzolashi kutilmoqda.
Fransiyalik mutaxassis terma jamoani UEFA Millatlar Ligasi, Yevro–2028 va 2030-yilgi FIFA Jahon chempionatiga tayyorlaydi.
Zidan bungacha faqat klub futbolida faoliyat yuritgan. U “Real Madrid”ni 2016–2018 va 2019–2021-yillarda boshqarib, klub bilan uch marta UEFA Chempionlar Ligasi g‘olibi bo‘ldi. Shuningdek, ikki bor Ispaniya chempionligini qo‘lga kiritdi va yana qator xalqaro sovrinlarni yutdi.
Amaldagi bosh murabbiy Didye Desham 2026-yilgi Jahon chempionatining uchinchi o‘rin uchun bahsidan so‘ng Fransiya terma jamoasini tark etadi. Fransuzlar 19-iyulga o‘tar kechasi ushbu uchrashuvda Angliya terma jamoasiga qarshi maydonga tushadi.
Desham 2012-yildan buyon Fransiya terma jamoasini boshqarib kelmoqda. Uning qo‘l ostida Fransiya 2018-yilgi Jahon chempionati g‘olibiga aylangan.
