Pokiston hukumati 7-iyul kuni Sharjadan (BAA) Karachiga parvoz paytida radarlardan yo‘qolgan Boeing 737-4M0 yuk samolyotining qoldiqlarini topdi. Bu haqda Flightradar24 aloqa direktori Yan Petchenik ma’lum qildi.
Samolyot K2 Airways aviakompaniyasiga tegishli bo‘lgan. Uning qoldiqlari Arabiston dengizida, Ormara shahridan taxminan 98 kilometr janubda topilgan. Hozirda ekipaj a’zolarini qidirish ishlari davom etmoqda. Bortda ikki nafar uchuvchi, ikki bort muhandisi va texnik xizmat xodimi bo‘lgan.
Samolyot Karachi port shahridan 250 kilometr g‘arbda, Arabiston dengizi uzra radarlardan yo‘qolgan. Pokiston aeroportlari boshqarmasiga ko‘ra, radarlar samolyotning keskin balandlik yo‘qotgani va yo‘nalishini o‘zgartirganini qayd etgan. Bundan bir necha daqiqa oldin uchuvchi navigatsiya tizimidagi muammolar haqida xabar bergan. Flightradar24 parvozlarni kuzatish xizmatiga ko‘ra, ADS-B (havo kemalarini kuzatish texnologiyasi)ning dastlabki ma’lumotlari “ehtimoliy halokatga ishora qilgan”.
Pokiston bosh vaziri Shahboz Sharif ekipaj a’zolarining oila a’zolariga hamdardlik bildirgan. Qidiruv-qutqaruv operatsiyasini Pakistan Airports Authority davlat agentligi muvofiqlashtirmoqda. K2 Airways esa favqulodda xizmatlar bilan hamkorlik qilmoqda.
Mazkur samolyot dastlab yo‘lovchi tashishga mo‘ljallangan bo‘lib, 1999-yilda Aeroflot aviakompaniyasi tarkibida foydalanila boshlagan. Keyinchalik, 2004-yilda Garuda Indonesia parkiga o‘tgan. 2012-yilda esa yuk samolyotiga aylantirilib, avval TNT Airways, so‘ng ASL Airlines tomonidan foydalanilgan.
