Gonkong observatoriyasi 18-iyun kuni mahalliy vaqt bilan soat 12:55 da eng yuqori — “qora” yomg‘ir ogohlantirish signalini berdi. Shundan so‘ng maktablar yopildi, ba’zi korxonalar esa ishni to‘xtatdi. Rasmiylar aholini xavfsiz joylarga yashirinishga va kuchli suv toshqinlaridan ehtiyot bo‘lishga chaqirdi.
Observatoriya saytidagi ma’lumotga ko‘ra, bir soat ichida 70 millimetrdan ortiq yog‘ingarchilik kuzatilgan va kuchli yomg‘ir davom etishi mumkin. Bu 2026-yilda ikkinchi marta “qora” xavf darajasi e’lon qilinishidir. Birinchisi bundan bir hafta oldin, 8-iyun kuni yuz bergandi.
Ayni paytda moliya markazi va Janubiy Xitoyning katta qismi bo‘lgan Gonkong bir necha kundan beri yomg‘ir ostida qolmoqda. Bunga faol janubiy-g‘arbiy musson shamollari va past bosimli havo oqimining hududda uzoq saqlanib qolgani sabab bo‘ldi.
Shuningdek, Gonkongda kuchli shamol esishi ham davom etishi mumkin. Shaharning janubiy-g‘arbidagi Tay O tumanida shamol tezligi soatiga qariyb 80 kilometrga yetgani qayd etildi. Bu noqulay ob-havo 19-iyun kuni boshlanadigan “Ajdaho qayiqlari” festivali arafasiga to‘g‘ri keldi. Bu bayram sababli aholi ketma-ket uch kun dam oladi va ko‘pchilik sayohatga chiqishni rejalashtirgan edi.
Gonkong bilan chegaradosh bo‘lgan Xitoyning Shenjen shahri rasmiylari ham “qizil” yomg‘ir signalini e’lon qildi. Ular aholini pasttekisliklar, suv bosgan joylar va boshqa xavfli hududlardan uzoqroq turishga chaqirdi. Rasmiylarning ogohlantirishicha, tog‘larda sel kelishi, ko‘chki va boshqa tabiiy ofatlar xavfi ortgan.
Bundan oldin Gonkongda telefon yoki kompyuter parollarini xavfsizlik xodimlariga bermaganlar qamoqqa hukm qilinishi haqida xabar berilgan edi.
