Rossiyaning “Admiral Grigorovich” fregati La-Mansh bo‘g‘ozida unga taxminan 500 metr masofaga yaqinlashgan Buyuk Britaniya bayrog‘i ostidagi fuqarolik yaxtasi tomon ogohlantiruvchi o‘q uzdi. Bu haqda Meduza yozmoqda.
Britaniyaning Press Association agentligi ma’lumotlariga ko‘ra, hodisa oqibatida jabrlanganlar yo‘q.
Voqea Buyuk Britaniyaga qarashli Uayt oroli va Fransiyaning Normandiya sohili o‘rtasida sodir bo‘lgan. Britaniya Mudofaa vazirligi hodisa yuzasidan tekshiruv boshlaganini ma’lum qildi.
Ogohlantiruvchi o‘q uzilgan Bright Future yaxtasi britaniyalik nafaqaxo‘rlar Alan va Jeyn Kelveyga tegishli. Er-xotin Buyuk Britaniya va Fransiya sohillari bo‘ylab sayohat qilib, mahalliy yelkanli sport musobaqalarida ishtirok etib kelmoqda.
Hodisa Buyuk Britaniya 14-iyun kuni Rossiyaning “soya floti”ga aloqadorlikda gumon qilingan “Smirtos” tankerini qo‘lga olganidan bir necha kun o‘tib sodir bo‘ldi. London bu urush boshlanganidan buyon ilk bor Rossiya bilan bog‘liq tankerga nisbatan bunday chorani qo‘lladi.
Avvalroq Buyuk Britaniya Rossiyaning suyultirilgan tabiiy gaz (STG) tashuvchi “soyalar floti” kemalariga qarshi dunyoda birinchi bo‘lib sanksiya joriy etgan edi.
