Ispaniya La Ligasining 35-turidan o‘rin olgan “Barselona” va “Real Madrid” jamoalari o‘rtasidagi uchrashuv yakunlandi. “Kamp Nou” stadionida bo‘lib o‘tgan bahsda “ko‘k-anorranglilar” 2:0 hisobida g‘alaba qozonib, mamlakat chempioniga aylandi.
O‘yinning 9-daqiqasida “Barselona” hujumchisi Markus Reshford o‘yindagi birinchi golni kiritdi. 18-daqiqada mezbonlar hujumchisi Ferran Torres jamoasining ustunligini ikkitaga oshirdi.
Shu tariqa Kataloniya klubi o‘z tarixida 29-bor La Liga g‘olibligini qo‘lga kiritdi.
35-turdan so‘ng “Barselona” 91 ochko jamg‘argan holda turnir jadvalida peshqadamlik qilmoqda. Madridning “Real” klubi esa ikkinchi o‘rinda bormoqda. “Qirollik klubi” hisobida 77 ochko mavjud.
Xans-Diter Flik shogirdlari 36-turda “Alaves” maydoniga safar qiladi, Alvaro Arbeloa qo‘l ostidagi jamoa “Real Ovuedo”ga qarshi bahs olib boradi.
