Suriya prezidenti Ahmad ash-Shara’a o‘zining ikki akasi — Maher va Hazemni ma’muriyatdagi yuqori lavozimlaridan bo‘shatdi. Bu haqda prezidentga yaqin manbaga tayanib, i24News xabar berdi.
Ma’lum qilinishicha, tegishli qaror hukumatdagi kadrlar almashinuvi hamda Suriya xalqi bilan ishonchni qayta tiklashga urinish doirasida qabul qilingan.
Maher ash-Shara’a Suriya prezidenti ma’muriyatining bosh kotibi lavozimida ishlab kelayotgan edi. Uning o‘rniga Homs viloyatining sobiq gubernatori Abdurahmon al-Oama tayinlandi.
Maherning rafiqasi rossiyalik bo‘lib, o‘zi ham rus tilida gaplasha oladi. Shu sababli u Ahmad ash-Shara’a va Moskva o‘rtasidagi o‘ziga xos “ko‘prik” hisoblanadi. i24news manbasiga ko‘ra, Maher yaqin orada Suriyaning Rossiyadagi elchisi etib tayinlanishi kutilmoqda.
Prezidentning yana bir akasi — Hazem ash-Shara’a Iqtisodiy rivojlanish bo‘yicha oliy kengash vitse-prezidenti lavozimidan ketdi. Aprel oyida ularning otasi, iqtisodiy sharhlovchi Husayn ash-Shara’a o‘g‘illari haqida gapirib, Maher va Hazem o‘z lavozimlarini “qo‘llari pok va yaxshi obro‘ bilan” tark etishini aytgandi.
