AQSHning “Inter Mayami” klubi MLS muntazam chempionati 11-turi doirasida o‘z maydonida “Orlando Siti”dan alamli mag‘lubiyatga uchradi.
Mayamidagi uchrashuv 3:4 hisobida yakunlandi. Maydon egalari Yen Frey (4-daqiqa), Telasko Segoviya (25-daqiqa) va Lionel Messi (34-daqiqa) kiritgan gollardan so‘ng 3:0 hisobida oldinda borayotgan edi. Shuningdek, Messining hisobida bitta golli uzatma ham mavjud.
Shundan so‘ng mehmonlar hujumkirlikka urg‘u berdi va dahshatli kambek amalga oshirdi. Jamoa safida Martin Oxeda xet-trik qayd etgan bo‘lsa (39, 68, 78-daqiqalarda penaltidan), Tayriz Spayser (90+3-daqiqa) yana bir golni o‘z hisobiga yozdirib qo‘ydi.
Shu tariqa, “Inter Mayami” 19 ochko bilan Sharqiy konferensiya jadvalida uchinchi o‘rinni egallab turibdi. “Orlando Siti” esa 10 ochko jamg‘argan holda 13-pog‘onadan joy olgan.
Ma’lumot uchun, Lionel Messi “Inter Mayami” safida 100-o‘yinda maydonga tushdi. Argentinalik futbolchi shu vaqt mobaynida 86 ta gol va 45 ta golli uzatmaga mualliflik qilgan. Uning MLS klubi bilan shartnomasi 2028-yilning 31-dekabr kuniga qadar mo‘ljallangan. Transfermarkt portal Messining bozor qiymatini 15 million yevroga baholagan.
