Xalqaro futbol federatsiyalari assotsiatsiyasi FIFA milliy terma jamoalarning yangilagan reytingini e’lon qildi. Unda O‘zbekiston milliy terma jamoasi 1465,34 ochko bilan avvalgi oyga nisbatan ikki pog‘ona yuqoriladi. Jamoa ayni vaqtda 50-o‘rinni egallab turibdi.
Fabio Kannavaro boshchiligidagi “oq bo‘rilar” mart oyidagi FIFA kunlari doirasida Gabon terma jamoasini 3:1 hisobida mag‘lub etdi, Venesuela bilan durang o‘ynadi.
Ayni paytda O‘zbekiston terma jamoasi Osiyoning eng kuchli besh jamoasi qatoridan joy olgan. Undan yuqori o‘rinlarda Yaponiya (1660,43), Eron (1615,30), Janubiy Koreya (1588,66) va Avstraliya (1580,67) qayd etilgan.
“Oq bo‘rilar”ning 2026-yilgi Jahon chempionati “K” guruhidagi raqiblarining ham reytingdagi o‘rinlari o‘zgardi. Portugaliya 1763,83 ochko bilan 5-pog‘onaga ko‘tarilgan bo‘lsa, Kolumbiya (1693,09) 13-o‘rinda qayd etilgan. Jahon chempionati yo‘llanmasiga ega chiqqan Kongo Demokratik Respublikasi 1478,35 ochko bilan 46-o‘ringa ko‘tarildi.
Ma’lumot uchun, hozirda FIFA reytingida Fransiya yetakchilik qilmoqda. Didye Desham boshqaruvidagi jamoa Argentina va Ispaniyani ortda qoldirib, 1-o‘ringa ko‘tarildi — 1877,32 ochko. Amaldagi Yevropa chempioni Ispaniya hisobida 1876,40 ochko mavjud. Amaldagi Jahon chempioni Argentina 1874,81 ochko bilan kuchli uchlikni yakunlab bergan.
