AQSH rasmiylari Suriya hududidagi qariyb 1 000 nafarga yaqin harbiy xizmatchining barchasini olib chiqib ketish jarayoni boshlanganini ma’lum qildi. Shu bilan ISHIDga qarshi kurashgan Amerika harbiy ishtirokiga nuqta qo‘yilmoqda. Bu haqda amerikalik manbalarga tayanib, The Wall Street Journal xabar berdi.
Strategik bazalar bo‘shatildi
Ma’lum qilinishicha, qo‘shinlarni olib chiqish jarayoni Suriyaning shimoli-sharqiy qismidagi strategik postlarni hamda Suriya, Jordaniya va Iroq chegarasidagi hududlarni allaqachon qamrab olgan.
Xususan, o‘tgan haftada AQSH harbiylari at-Tanf bazasidan chiqib ketganini tasdiqlagan. Suriya janubida, Iroq va Iordaniya chegaralari yaqinida joylashgan ushbu baza 2017-yilda jiddiy mag‘lubiyatga uchragunga qadar Iroq va Suriyaning katta qismini nazorat qilgan ISHIDga qarshi xalqaro koalitsiya operatsiyalarining asosiy markazi bo‘lib xizmat qilgan edi.
AQSH Markaziy qo‘mondonligi (CENTCOM) o‘tgan haftadagi ushbu “tartibli chiqish”ni sharoitdan kelib chiqqan rejali o‘tish jarayonining bir qismi deb atagan. The Wall Street Journal nashrining yozishicha, qo‘shinlarning to‘liq olib chiqib ketilishi kelgusi ikki oy davomida yakunlanadi. Donald Tramp ma’muriyati ushbu qarorni kamida yanvar oyidan beri muhokama qilib kelayotgan edi.
Eron bilan keskinlik va dengiz kuchlari
Nashrning ta’kidlashicha, Suriyadan qo‘shinlarni olib chiqish qarori Yaqin Sharqning boshqa nuqtalarida, xususan, Eron bilan keskinlik fonida AQSH dengiz va havo kuchlarining kuchaytirilishi bilan bog‘liq emas.
So‘nggi haftalarda Tramp ma’muriyati Erondagi namoyishlarning bostirilishi va yadroviy muzokaralardagi qiyinchiliklar sababli Tehronga qarshi harbiy kuch ishlatish bilan tahdid qilgan edi. Ushbu tahdidlar doirasida mintaqaga ikkinchi aviatashuvchi — USS Gerald R.Ford kemasi yo‘naltirilgan.
AQSH vositachiligidagi yangi kelishuv
Suriyadan chiqib ketish haqidagi qaror mamlakat xavfsizlik tizimini qayta shakllantirish va davlat hokimiyatini mustahkamlashga qaratilgan kelishuvdan so‘ng qabul qilindi. AQSH rasmiylari ushbu bitimni milliy birlik va yarashuv sari tashlangan muhim qadam deb baholamoqda.
Kelishuvning asosiy bandlariga ko‘ra, Vashingtonning ISHIDga qarshi kurashdagi asosiy hamkori bo‘lgan kurdlar yetakchiligidagi Suriya demokratik kuchlari (SDK) Suriya armiyasi tarkibiga integratsiya qilinadi.
Bu kelishuv muvaqqat prezident Ahmad ash-Shara’a boshchiligidagi hukumat kuchlari SDK nazoratidagi shimoli-sharqiy hududlarni qaytarib olish uchun harakat boshlaganidan so‘ng amalga oshdi.
Avvalroq hukumat qo‘shinlari va SDK o‘rtasida qonli to‘qnashuvlar yuz bergan edi, bu esa keng ko‘lamli urush xavfini tug‘dirgandi. 2026-yil 29-yanvarda AQSH ko‘magida erishilgan bitim “mo‘rt” sulh o‘rnatdi va ikki harbiy kuchning birlashishi bo‘yicha muzokaralarga yo‘l ochdi.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
