Ukrainada ishlash uchun 2024-yilda ruxsatnoma olgan migrantlarning 700 ga yaqini O‘zbekiston fuqarolari bo‘lgan. Bu haqda Migratsiya siyosati idorasi rahbari Vasiliy Voskoboynik “UNIAN” agentligi bilan suhbatda ma’lum qildi.
Ukrainada urush kechayotgani tufayli mehnat migrantlarini jalb qilishga bo‘lgan ehtiyoj kuchaymoqda. Biroq mamlakatda ishlashni xohlovchilar soni kamayib bormoqda.
Urush davrida berilgan ruxsatnomalar soni sezilarli darajada kamaydi. 2024-yilda 6 mingga yaqin ruxsatnoma berilgan. 2025-yildagi raqamlarni hali ko‘rmadim, ammo menimcha, butun mamlakat bo‘yicha 8–9 ming atrofida ruxsatnoma berilgan bo‘lishi mumkin, dedi ekspert.
U urushdan oldin, 2021-yilda Ukrainaga ishga joylashish uchun 24 mingta ruxsatnoma berilgan yoki uzaytirilganini aytdi.
Qizig‘i shundaki, butun mamlakat bo‘yicha Bangladesh va Pokistondan atigi bir necha yuz kishi mehnat qilish uchun ruxsatnoma olgan. Eng ko‘p ruxsatnoma olganlar esa Turkiya, O‘zbekiston va Ozarbayjon fuqarolari bo‘lgan, dedi Vasiliy Voskoboynik.
Uning ta’kidlashicha, 2024-yilda eng ko‘p ruxsatnomalarni Turkiya fuqarolari (1 mingga yaqin) olgan. Keyingi o‘rinlarda O‘zbekiston (700 ga yaqin), Hindiston (500), Ozarbayjon (400), Xitoy (350), Bangladesh (319), Pokiston (205) va Nepal (146 ta) turadi. 2025-yil kuzida BMTning Xalqaro mehnat tashkiloti vakili Ukrainaga jami 8,6-8,7 million ishchi kuchi kerak bo‘lishini aytgandi.
