Ukrainada Milliy korrupsiyaga qarshi byuro Davlat chegara xizmati sobiq rahbari Sergey Deynekoning uyida tintuv oʻtkazmoqda. Bu haqda “Ukrainskaya Pravda” xabar berdi.
Deyneko sigaret kontrabandasi ishi doirasida gumonlanuvchi sifatida ko‘rilmoqda. Ma’lumotlarga ko‘ra, kontrabanda mahsuloti xorijiy raqam va diplomatik belgilar o‘rnatilgan avtomobillar orqali olib o‘tilgan. Avtomobillarda diplomatik pasportli shaxslar bo‘lgani sababli transport vositalari tekshiruvdan o‘tkazilmagan.
Deyneko har bir avtomobil uchun 3 ming yevro olgani taxmin qilinmoqda. Birgina 2023-yil iyul–noyabr oylarida chegarachilar 68 ta avtomobilning to‘sqinliksiz o‘tishi evaziga kamida 204 ming yevro miqdorida noqonuniy daromad olgan. Faoliyatni yashirish maqsadida gumonlanuvchilar Chexiya va Avstriya hududida ro‘yxatdan o‘tgan avtomobillardan foydalangan.
Ukraina prezidenti Vladimir Zelenskiy 4-yanvar kuni Sergey Deynekoni Davlat chegara xizmati rahbari lavozimidan ozod etgandi. Deyneko ushbu lavozimni 2019-yil iyunidan beri egallab kelgan. U hozirda Ichki ishlar vazirining maslahatchisi sifatida faoliyat yuritmoqda.
