Ukrainaning bosib olingan Mariupol shahri hamda unga tutash hududlar ustidan nazorat Ramzan Qodirovning “Axmat” tuzilmasi ixtiyoriga topshirilishi mumkin. Ukraina partizanlarining Atesh harakatiga ko‘ra, Rossiya rasmiylari bu orqali Checheniston prezidentining sadoqatini saqlab qolmoqchi.
Manbaga ko‘ra, so‘nggi paytlarda Mariupolda “qodirovchilar” sezilarli darajada ko‘paygan. Bundan maqsad shahardagi resurslar va iqtisodiy obyektlar ustidan to‘liq nazorat o‘rnatish, shuningdek, bosib olingan hududda Grozniyning ta’sirini kuchaytirishdir. Atesh chechen tuzilmalari urushda vayron bo‘lgan shaharning sanoat salohiyati bilan qiziqayotganini ta’kidlagan.
Keng ko‘lamli urush boshlangan 2022-yilga qadar Mariupolning “Azovstal” va “Illich” metallurgiya kombinatlari butun mamlakat po‘lat ishlab chiqarishining, taxminan, 40 foizini ta’minlagan. Qolaversa, shaharda mashinasozlik hamda xizmat ko‘rsatish tarmoqlari ham rivojlangan edi.“Biz forma kiygan shaxslarning joylashuvi va ularning qimmat avtomobillari qatnov yo‘nalishlarini muntazam ravishda kuzatib, qayd etib boryapmiz”, deyiladi harakat bayonotida.
Partizanlar harakatiga ko‘ra, Rossiya mulozimlarining bu qarori mahalliy aholi manfaatlariga mos kelmaydi. Qayd etilishicha, rossiyaliklar Mariupolni shahar emas, balki resurslar bazasi sifatida ko‘ryapti.
