Ispaniya La Ligas 20-turidan o‘rin olgan “Real Madrid” hamda “Levante” o‘rtasidagi bahs yakuniga yetdi. 17-yanvar, shanba kuni Madriddagi “Santiago Bernabeu” stadionida kechgan bahsda “qirollik klubi” 2:0 hisobida g‘alaba qozondi.
Uchrashuvdagi hisob 58-daqiqada Kilian Mbappe tomonidan ochildi. Fransiyalik hujumchi hakam tomonidan belgilangan 11 metrlik jarima zarbasini aniq amalga oshirib, tablodagi natijani 1:0 ko‘rinishiga keltirdi. Oradan 7-daqiqa o‘tib, Madrid klubi hisobni yiriklashtirdi. 65-daqiqada Raul Asensio “Real”ning o‘yindagi ikkinchi goliga mualliflik qildi. Mazkur hisob o‘yin yakuniga qadar o‘zgarmadi va “qirollik klubi” 20-turda 2:0 hisobida g‘alaba qozondi.
Shu tariqa, Alvaro Arbeloa “qirollik klubi” boshqaruvidagi ilk g‘alabasini qo‘lga kiritdi. Ayni paytda madridliklar 48 ochko bilan La Liga turnir jadvalida 2-o‘rinni egallab turibdi. Mag‘lubiyatga uchragan “Levante” esa 14 ochko bilan 19-pog‘onani band etgan.
Ispaniya La Ligasi20-tur
“Real Madrid” — “Levante” 2:0
Gollar: 1:0 — Mbappe (58, penalti), 2:0 — Asensio (65)
