Madridning “Real” klubi bosh murabbiyi Alvaro Arbeloa Ispaniya Kubogi 2025/26-yilgi mavsumida jamoaning musobaqani erta tark etishi haqida fikr bildirib, mag‘lubiyatni o‘z zimmasiga oldi.
“Bu klubda durang ham salbiy natija sifatida qabul qilinadi. Mag‘lubiyat esa, ayniqsa pastroq liga vakiliga qarshi bo‘lsa, yanada og‘ir baholanadi. Agar aybdor izlanadigan bo‘lsa, birinchi navbatda bu — men. Tarkibni tanladim, o‘yin uslubini belgiladim va almashtirishlarni amalga oshirdim. Futbolchilar meni yaxshi qabul qilgani uchun rahmat aytaman. Endi men ularning jismoniy hamda ruhiy holatini tiklashga yordam beraman. Tarkib borasida ishonchim komil edi. Jamoada iqtidorli futbolchilar bor, biroq men talab qilayotgan narsani darhol bajarish oson emas. Yakunda mas’uliyat baribir mening zimmamda qoladi”, dedi Arbeloa o‘yindan keyingi matbuot anjumanida.
Ma’lumot o‘rnida, turnirning 1/8 final bosqichida “qirollik klubi” “Albasete”ga 2:3 hisobida yutqazdi. Hal qiluvchi gol ikkinchi bo‘limga qo‘shib berilgan daqiqalarda o‘tkazib yuborildi. “Albasete” Ispaniyaning ikkinchi ligasi vakili bo‘lib, jamoa hozirda turnir jadvalida 24 ochko bilan 17-pog‘onani egallab turibdi.
