Prezident Shavkat Mirziyoyevga Buxoro shahrining bosh rejasi taqdim etildi. Bu haqda prezident matbuot xizmati xabar qildi.
Qayd etilishicha, unda qulay shahar muhitini shakllantirish, transport va turizm infratuzilmasini rivojlantirish, shuningdek, kongress-xoll, amfiteatr, kutubxona kabilarni o‘z ichiga oladigan ko‘p funksiyali majmua sifatida tarixiy-etnografik bog‘ barpo etish nazarda tutilgan.
Kompleksda fud-xoll, chakana savdo va tijorat obyektlari hamda yuqori toifali mehmonxonani qurish ham rejalashtirilgan.
Eslatib o‘tamiz, prezident 2024-yil 31-may kuni Buxoro viloyatiga tashrifi chog‘ida Buxoro shahrini 2045-yilgacha rivojlantirish konsepsiyasi bilan tanishgandi.
Shaharda “Yangi O‘zbekiston” massivi va bog‘i bunyod etilishi rejalashtirilgan. Bog‘da Buxoro tarixi zamonaviy yondashuvlar asosida namoyon etilishi ko‘zda tutilgan. Bu loyihaning g‘oyaviy mazmuni va texnik-iqtisodiy asoslarini ishlab chiqish bo‘yicha ko‘rsatmalar berilgan.
