Afrika Millatlar Kubogi yarim finali doirasida Senegal va Misr terma jamoalari o‘rtasidagi uchrashuv yakuniga yetdi. Bahs Marokashning Tanjer shahrida joylashgan “Ibn Batuta” stadionida bo‘lib o‘tdi. Unda Senegal terma jamoasi 1:0 hisobida g‘alaba qozondi.
Uchrashuvdagi yagona gol 78-daqiqada Senegal hujumchisi Sadio Mane tomonidan kiritildi. Saudiya Arabistoning “An-Nassr” klubi futbolchisi uzoq masofadan yo‘llangan zarbasi bilan hisobni ochdi va jamoasining g‘alabasini ta’minladi.
Turnir finalida Senegal terma jamoasi Nigeriya — Marokash juftligi g‘olibi bilan to‘qnash keladi.
2026-yilgi Afrika Millatlar Kubogi musobaqasi Marokashda bo‘lib o‘tmoqda. Senegal terma jamoasi chorak final bosqichida Mali ustidan 1:0 hisobida g‘alaba qozonib, yarim finalga yo‘l olgan, Misr esa 1/4 finalda Kot-d’Ivuar terma jamoasini 3:2 hisobida mag‘lub etgan edi.
Turnirning amaldagi g‘olibi Kot-d’Ivuar bo‘lib, jamoa 2023-yilgi musobaqa finalida Nigeriyani 2:1 hisobida mag‘lub etgan.
