Qatarning Doha shahrida shaxmatning rapid va blits yo‘nalishlari bo‘yicha kattalar o‘rtasidagi Jahon chempionati davom etmoqda. Musobaqaning umumiy sovrin jamg‘armasi 1 million yevrodan ortiqni tashkil etadi.
Musobaqaning beshinchi kuni doirasida blits bahslari davom ettirildi va yana 6 ta tur uchrashuvlari o‘tkazildi. O‘zbekistonlik grossmeyster Nodirbek Abdusattorov ushbu bahslarda yaxshi natija qayd etib, 6 ta partiyadan 3 tasida g‘alaba qozondi, 2 ta uchrashuvda durang o‘ynadi va bitta partiyada mag‘lub bo‘ldi. Shu tariqa, 19 imkoniyatdan 13 ochko jamg‘argan Abdusattorov qo‘shimcha ko‘rsatkichlarga ko‘ra turnir jadvalida 4-o‘rinni egalladi va yarim final ishtirokchisiga aylandi.
Yarim finalda Abdusattorov blits bahslarini 15 ochko bilan 1-o‘rinda yakunlagan hindistonlik Arjun Erigaisiga qarshi bahs olib bordi. O‘zaro qarama-qarshilikda o‘zbekistonlik grossmeyster 2,5:0,5 hisobida raqibidan ustun keldi va finalga yo‘ldi. Endi Nodirbek Abdusattorov chempionlik uchun Magnus Karlsenga qarshi bahs olib boradi. Dunyoning birinchi raqamli shaxmatchisi AQSH vakili Fabiano Karuanani 3:1 hisobida mag‘lub etishga muvaffaq bo‘ldi. Final bahsi bugun o‘tkaziladi.
2025-yilgi Jahon kubogi g‘olibi Javohir Sindorov esa kun davomida 3 ta g‘alaba, 2 ta durang va bitta mag‘lubiyat qayd etib, 12,5 ochko bilan qo‘shimcha ko‘rsatkichlarga ko‘ra 14-o‘rinni egalladi.
Shuningdek, ayollar o‘rtasidagi musobaqada ham o‘zbekistonlik shaxmatchilar munosib natijalar qayd etmoqda.
O‘zbekistonning uchinchi raqamli shaxmatchisi Umida Omonova kun davomida bitta g‘alaba, bitta durang va 2 ta mag‘lubiyat qayd etib, 10 ochko bilan musobaqani 8-o‘rinda yakunladi.
Ma’lumot uchun, rapid bo‘yicha bellashuvlarda Magnus Karlsen va Aleksandra Kostenyuk Jahon chempionligini qo‘lga kiritgan edi.
