Tojikistonda yoqilg‘i tashiyotgan yuk poyezdi relsdan chiqib, yonib ketdi. Bu haqda “Tojikiston temiryo‘llari”ga tayanib Asia-Plus xabar berdi.
Ma’lum qilinishicha, hodisa Yavan tumani Daxana qishlog‘i yaqinida yuz bergan. Temiryo‘l xodimlari hodisaga yer ko‘chkisi sabab bo‘lganini aytmoqda. Tuproq siljishi sababli temiryo‘l polotnosiga zarar yetgan. Oqibatda poyezd izdan chiqib, ag‘darilgan va yonib ketgan. “Tojikiston temir yo‘llari” jabrlanganlar yo‘qligini ma’lum qildi.
Voqea joyiga korxona rahbariyati va maxsus ishchi guruh yetib kelgan. Ular hodisaning barcha holatlarini o‘rganish va temiryo‘l infratuzilmasiga yetkazilgan zarar oqibatlarini baholash bilan shug‘ullanmoqda.
