Kataloniyaning “Barselona” klubi sport direktori Deku Lionel Messining “ko‘k-anorranglilar” safiga qaytishi mumkinligi haqidagi savolga javob berdi. Bu haqda insayder Fabritsio Romano o‘zining X (sobiq Twitter) sahifasida ma’lum qildi.
“Messini qisqa muddatga ijaraga olish? Leoning ‘Inter Mayami’ bilan shartnomasi bor. Bu haqda qachonlardir gap bo‘lgan deb o‘ylamayman. Messi — har doim Messi. U har doim o‘zi o‘ynayotgan jamoasiga nimadir bera oladi, lekin hozir bu mavzuni muhokama qilmaymiz”, deya fikr bildirdi Deku.
Ma’lumot uchun, avvalroq OAVda argentinalik hujumchi 2026-yil AQSH, Meksika va Kanada maydonlarida bo‘lib o‘tadigan Jahon chempionatiga optimal sport formasida borish uchun kataloniyaliklar bilan shartnoma imzolashi haqida xabarlar tarqalgandi.
Eslatib o‘tamiz, Messi 2003–2021-yillar oralig‘ida “Barselona” sharafini himoya qilgan. Ammo 2021-yilda klub moliyaviy qiyinchiliklar ortidan futbolchi bilan yangi shartnoma imzolamadi. Shu bois, kataloniyaliklar Leo bilan matbuot anjumanida xayrlashdi.
Messi faoliyati davomida 10 marta Ispaniya chempionligini, 4 marta Chempionlar Ligasi g‘olibligini qo‘lga kiritgan. Argentinalik futbolchi klub tarixidagi eng yaxshi to‘purar hisoblanadi — 672 ta gol. Leo 2011/2012-yilgi mavsumda La Ligada 50 ta gol urib, liga rekordini o‘rnatgan. 2021-yilda Messi “Barselona”ni tark etib, “Pari Sen-Jermen” klubiga erkin agent sifatida o‘tdi. Hozirda hujumchi AQSHning “Inter Mayami” jamoasi safida faoliyatini davom ettirmoqda.
