Rossiya Ukrainadagi urush tezroq yakun topishini istayotganini, ammo tinchlik muzokaralari hozircha to‘xtab qolganini ma’lum qildi. Bu haqda RBC News xabar berdi.
Kreml matbuot kotibi Dmitriy Peskov bu haqda 10-noyabr kuni jurnalistlarga aytar ekan, AQSH prezidenti Donald Trampning so‘nggi bayonotiga javob qaytargan. Tramp o‘tgan haftada Vengriya bosh vaziri Viktor Orban bilan uchrashuvda “Urush tez orada tugaydi, deb o‘ylayman”, degandi.
Peskovning so‘zlariga ko‘ra, Rossiya urushni siyosiy va diplomatik yo‘l bilan yakunlash tarafdori.
“Albatta, biz bu mojaroni imkon qadar tezroq tugashini xohlaymiz. Urush Rossiya o‘z oldiga qo‘ygan maqsadlarga erishganida tugaydi. Ammo hozir jarayon to‘xtab qolgan, bunga biz sababchi emasmiz”, degan Peskov Ukrainaning pozitsiyasini tanqid qilib.
Uning aytishicha, tinchlik bo‘yicha muzokaralar Ukraina tomoni sababli to‘xtab qolgan.
“Ukraina Yevropa davlatlarining bosimi ostida. Yevropaliklar Ukraina urush orqali o‘z manfaatlarini himoya qila oladi, deb o‘ylaydi. Bu katta xato”, degan Peskov.
Ayni paytda, Ukraina va Yevropa mamlakatlari Moskvani tinchlik tashabbuslariga to‘siq bo‘lishda ayblab kelmoqda. Rossiya va Ukraina o‘rtasidagi yuzma-yuz muzokaralar 2023-yil iyul oyidan beri o‘tkazilmagan.
Tramp Rossiya prezidenti Vladimir Putin va Ukraina rahbari Vladimir Zelenskiyni uchrashuvga ko‘ndirishga uringan, ammo Kreml bunday sammit faqat Moskvada bo‘lishi mumkinligini aytgan. Zelenskiy esa bu shartni rad etgan va Putinning “tinchlik istagi” borligiga ishonmasligini bildirgan.
Urush boshlanganiga to‘rt yil to‘lishi arafasida Rossiya Ukrainaning taxminan 19 foiz hududini nazorat qilmoqda. Hozirda mamlakat Pokrovsk va Kupyansk shaharlarini egallash uchun harbiy harakatlarni kuchaytirgan.
