Afg‘onistonning “Tolibon” hukumati chegara ishlari vaziri Nurulloh Nuriy Pokistonga to‘liq va to‘g‘ridan to‘g‘ri urush boshlash bilan tahdid qildi. Bu haqda Afghanistan International xabar berdi.
Nuriy Pokiston mudofaa vaziri Xavoja Asifga murojaat qilib, shunday dedi:
“Afg‘on xalqining sabrini sinamang va harbiy texnologiyangizga haddan tashqari ishonmang”.
Nuriyning aytishicha, Pokiston Afg‘onistonda AQSH va Rossiyaning boshiga tushgan holatdan saboq olishi kerak.
“Siz haqiqatan ham keksalar va yoshlar ortingizdan ergashishiga ishonasizmi?” degan Nuriy.
“Tolibon” vazirining so‘zlariga ko‘ra, Pokiston AQSH va Rossiyadan farqli o‘laroq, Afg‘onistondan uzoq emas — ikkala tomon Panjob va Sind orqali bog‘langan. Bu bayonotlar “Tolibon” Peshavorni Afg‘oniston hududining bir qismi deb hisoblashini ko‘rsatmoqda.
Bu tahdid Istanbulda bo‘lib o‘tgan “Tolibon” va Pokiston muzokaralari chog‘ida yangramoqda. Pokiston mudofaa vaziri Xavoja Asifning aytishicha, Turkiyadagi muzokaralar boshi berk ko‘chaga kirib qolgan va hozircha yangi muzokara raundini belgilash rejalashtirilmayapti.
“Bizning natijasiz qaytishimiz — hatto vositachilar ham ‘Tolibon’dan umid uzganining belgisi”, degan Asif.
Asifning so‘zlariga ko‘ra, “Tolibon” delegatsiyasi og‘zaki ishonch talab qilgan, ammo kelishuvlarni yozma ravishda rasmiylashtirishdan bosh tortgan. U esa xalqaro darajadagi muzokaralarda barcha bitimlar rasman hujjatlashtirilishi shartligini eslatgan.
