AQSH prezidenti Donald Tramp Ukraina rahbari Vladimir Zelenskiy bilan bo‘lgan uchrashuv chog‘ida, hozircha Ukrainaga uzoq masofaga uchadigan “Tomahawk” qanotli raketalarini yetkazib berish niyati yo‘qligini aytgan.
Bu haqda Axios nashri manbalariga tayanib xabar berdi. Manbalardan biri uchrashuv oson o‘tmaganini, Tramp esa qattiqqo‘l bo‘lganini ta’kidlagan. Yana bir manbaning so‘zlariga ko‘ra, uchrashuv davomida Tramp bir necha keskin bayonotlar qilgan va ayrim paytlarda suhbat ancha hissiy tus olgan.
Shu bilan birga, AQSH prezidenti uchrashuvdan so‘ng o‘tgan muloqotni qiziqarli va samimiy bo‘lganini aytgan. U Kiyev va Moskva tomonlarini urushni to‘xtatish va mavjud holatda kelishuvga erishishga chaqirgan.
O‘z navbatida, Zelenskiy AQSH prezidenti bilan uchrashuvdan so‘ng “Tomahawk” raketalari yetkazib berilishiga umid saqlayotganini aytgan.
“Yaxshi tomoni shuki, prezident Tramp ‘yo‘q’ demadi, ammo bugun u ‘ha’ ham demadi”, — degan Ukraina rahbari NBC telekanaliga bergan intervyusida.
