O‘zbekiston terma jamoasi oktyabr oyidagi FIFA kunlari doirasida Urugvayga qarshi maydonga tushdi. Malayziyaning Melaka shahrida joylashgan “Hang Jebat” stadionida o‘tgan bellashuvda janubiy amerikaliklar 2:1 hisobida zafar quchdi.
O‘yindagi hisob ikkinchi bo‘limning 51-daqiqasida Fokundo Torres tomonidan ochildi. 60-daqiqada Xuan Sanabriya tablodagi natijani 2:0 ko‘rinishiga keltirib qo‘ydi. 82-daqiqaga kelib, O‘zbekiston hisobni bittaga qisqartirdi. Eldor Shomurodov, Hojimat Erkinov hamda Husayn Norchayev tomonidan uyushtirilgan hujumni Ruslanbek Jiyanov gol bilan yakunlab, tablodagi natijani 1:2 ko‘rinishiga keltirib qo‘ydi.
Shu tariqa, O‘zbekiston terma jamoasi Fabio Kannavaro boshchiligidagi ikkinchi bahsda 1:2 hisobida imkoniyatni boy berdi.
Bu bellashuv Janubiy Amerikaning kuchli termalaridan biriga qarshi uchinchi o‘yin sifatida tarixda qoldi. Ilgari bo‘lgan ikki uchrashuv — 2018 va 2019 yillarda o‘tkazilgan va har ikkisida ham urugvayliklar 3:0 hisobida g‘alaba qozongan. Ruslanbek Jiyanov esa Urugvay darvozasini ishg‘ol qilgan ilk o‘zbekistonlik futbolchiga aylandi.
O‘rtoqlik uchrashuvi
O‘zbekiston — Urugvay 1:2
Gollar: 0:1 — Torres (51), 0:2 — Sanabriya (60), 1:2 — Jiyanov (82)
