Isroil Bosh vaziri Binyamin Netanyaxu AQSH prezidenti Donald Trampning HAMAS tinchlikka tayyor ekanini va yahudiy davlati G‘azo sektorini bombardimon qilishni to‘xtatishi kerakligi haqidagi bayonotidan hayratda qoldi. Bu haqda X ijtimoiy tarmog‘ida AQSHning Axios internet-portali jurnalisti Barak Ravid manbalarga tayanib ma’lum qilgan.
Uning manbasiga ko‘ra, Netanyaxu HAMASning javobi aslida “Tramp rejasini rad etish” deb hisoblagan.“Isroillik amaldor ta’kidlaganidek, Netanyaxu Prezident Trampning javobidan hayratga tushdi”, deya yozadi muxbir.
Jurnalistning aniqlashtirishicha, Isroil Bosh vaziri bu nuqtai nazarni Trampning bayonoti e’lon qilinishidan oldin AQSH tomoni bilan o‘tkazilgan maslahatlashuvlarda bildirgan. Manbaning aytishicha, Netanyaxu ushbu maslahatlashuvlar davomida “AQSH bilan ularning javob choralarini kelishib olish zarurligini” ta’kidlagan.
Bundan oldin Tramp Truth Social tarmog‘ida HAMAS harakati “barqaror tinchlikka tayyor” ekanini yozgan edi. Amerika rahbarining qo‘shimcha qilishicha, “garovga olinganlarni tez va xavfsiz olib chiqish uchun Isroil G‘azoni bombardimon qilishni darhol to‘xtatishi kerak”.
HAMAS Tramp rejasiga muvofiq barcha asirlarni ozod qilishga tayyorligini ma’lum qildi.
Shuningdek, harakat G‘azo sektorini boshqarishni falastinlik texnokratlardan iborat mustaqil hokimiyat organiga topshirishga rozi bo‘lgan.
3-oktyabr kuni Tramp, agar HAMAS 5 oktyabr kechgacha uning tinchlik rejasi shartlarini qabul qilmasa, “misli ko‘rilmagan do‘zax” bilan tahdid qilgan.
