“Manchester Siti” bosh murabbiyi Xosep Gvardiola Angliya Premyer Ligasi 4-turidan o‘rin olgan “Manchester Yunayted”ga qarshi bahs oldidan o‘z kelajagi haqida fikr bildirdi.
“Ko‘p marotaba aytganman — kelajakni oldindan bilmayman. Natijalar hammasini belgilaydi. Men yaxshi mavsum o‘tkazishim kerak. Agar klub o‘zgarishlarga muhtojligini sezsam, bir kun ham qolmayman. Ammo hozir har qachongidan ham bu ishni davom ettirishni xohlayapman”, dedi Gvardiola.
Shuningdek, ispaniyalik mutaxassis “Siti”dagi uzoq yillik faoliyatini faxr bilan eslab o‘tdi:
“Men bu yerga kelib, atigi 3 yillik shartnoma imzolagandim. O‘shanda 10 yil qolaman, deb o‘ylamaganman. Endi esa bu bilan faxrlanaman. Jamoa va klubga yana yordam berishni istayman”.
Eslatib o‘tamiz, Xosep Gvardiola 2016-yil yozidan buyon “Manchester Siti” klubini boshqarib kelmoqda. U hozirga qadar “shaharliklar” bilan Chempionlar Ligasi, Angliya Premyer Ligasi, mamlakat kubogi va Superkubogi kabi ko‘plab sovrinlarni qo‘lga kiritgan. Mutaxassisning “Siti” bilan shartnomasi 2027-yilning yoziga qadar amal qiladi.
