Xitoyda ota qizini qutqarish uchun jigarining bir qismini berdi. Xarajatlarni kamaytirish maqsadida operatsiyadan keyin uyida mustaqil davolandi. Bu haqda South China Morning Post xabar berdi.
2000-yilda tug‘ilgan Shen va uning rafiqasi Tao 2024-yilda oila qurgan. Ko‘p o‘tmay ularning qizi Yiyi dunyoga kelgan. Ammo chaqaloq tug‘ilgach, unda doimiy sarg‘ayish belgilari kuzatilgan. Bir nechta shifoxonalarda o‘tkazilgan tekshiruvlardan so‘ng, Yiyida tug‘ma jigar kasalligi va sirroz aniqlangan. Dastlab shifokorlar qizning ahvoli unchalik og‘ir emasligini aytib, konservativ davolashni tavsiya qilgan.
Biroq qizning sog‘lig‘i kutilmaganda og‘irlashib, jigar ko‘chirib o‘tkazish yagona chora bo‘lib qolgan. 13-avgust kuni ota o‘z qiziga jigarining bir qismini o‘tkazgan. Ammo oilada katta moliyaviy qiyinchiliklar yuzaga kelgan. Davolanish xarajatlari 100 ming yuandan (14 ming dollar) oshgan.
Shen xarajatlarni kamaytirish uchun operatsiyadan yarim oy o‘tmay uyiga qaytib, mustaqil ravishda davolanishga kirishgan. U ijaradagi uyida o‘zi bog‘lamlarini almashtirib davolangan. Shuningdek, kunlik mayda ishlar bilan shug‘ullana boshlagan. Hozirda qizning sog‘ligi yaxshilanmoqda. Shifokorlar u tez orada kasalxonadan chiqarilishi mumkinligini aytgan.
