O‘zbekiston milliy terma jamoasi 2026-yilgi Jahon chempionatiga tayyorgarlik doirasida Urugvayga qarshi maydonga tushadi. Bu haqda O‘zbekiston futbol assotsiatsiyasi matbuot xizmati xabar berdi.
Unga ko‘ra, mazkur jamoalar o‘rtasidagi bahs 13-oktyabr kuni Malayziyaning Kuala Lumpur shahrida tashkil etiladi.
Bu bellashuv Janubiy Amerikaning kuchli termalaridan biriga qarshi uchinchi o‘yin bo‘ladi. Ilgari ikki uchrashuv — 2018 va 2019 yillarda o‘tkazilgan va har ikkisida ham urugvayliklar 3:0 hisobida g‘alaba qozongan. Yangi belgilangan o‘yin Temur Kapadze boshchiligidagi jamoaga 2026-yil AQSH, Meksika va Kanada maydonlarida o‘tadigan mundial uchun tayyorgarlik vazifasini o‘tab beradi.
Ma’lumot uchun, hozirda Urugvay terma jamoasini argentinalik mutaxassis Marselo Byelsa boshqaradi. Transfermarkt portali “ko‘k-oqlar”ning umumiy qiymatini 433 million yevroga baholamoqda.
