Prezident matbuot xizmati xabariga koʻra, suhbat avvalida Rossiya yetakchisi Oʻzbekiston rahbari va koʻp millatli xalqini Mustaqillik kuni bilan samimiy tabriklab, farovonlik, barqaror taraqqiyot va ravnaq tilagan.
“Ilgariroq boʻlib oʻtgan oliy darajadagi muloqotlar chogʻida erishilgan kelishuvlarni amalga oshirish nuqtayi nazaridan Oʻzbekiston – Rossiya keng qamrovli strategik sheriklik va ittifoqchilik munosabatlarini yanada kengaytirish hamda mustahkamlash masalalari koʻrib chiqildi. Savdo-iqtisodiy va investitsiyaviy hamkorlik surʼatini saqlab qolishga qaratilgan muvofiqlashtirilgan chora-tadbirlarni qabul qilish muhim ekani taʼkidlandi”, deyiladi manbada.
Foto: “Daryo” / Madina Nurman
Uchrashuvda iqtisodiyot tarmoqlarida loyihalarni tayyorlash hamda amalga oshirishni jadallashtirish, hududlar oʻrtasida va tashkil etilgan qoʻshma sanoat parklari doirasida kooperatsiya aloqalarini ragʻbatlantirishga alohida eʼtibor qaratilgan.
“Gumanitar sohada, eng avvalo, madaniyat, sanʼat, fan va taʼlim yoʻnalishlarida samarali hamkorlik qilinayotgani katta mamnuniyat bilan qayd etildi”, deya xabar qilgan matbuot xizmati.
Shu bilan birga, prezidentlar xalqaro ahamiyatga molik masalalar yuzasidan ham fikr almashgan.
