Kataloniyaning “Barselona” klubi tarkibida to‘p surayotgan 21 yoshli yarim himoyachi Mark Kasadoga La Liganing boshqa vakili — “Betis” klubi jiddiy qiziqish bildirmoqda. Bu haqda Mundo Deportivo nashri xabar bermoqda.
Ma’lumotlarga ko‘ra, Andalusiya klubi futbolchi uchun rasmiy taklif yuborgan, biroq Kasado “ko‘k-anorranglilar” safini tark etishni istamayapti. Diario Sport nashrining yozishicha, futbolchi yangi bosh murabbiy Hansi Flik qo‘l ostida jamoada qolishni va asosiy tarkib uchun kurashishni maqsad qilgan.
“Betis” Kasadoni yaqinda “Atletiko” safiga yo‘l olgan Jonni Kardozaning o‘rniga munosib o‘rinbosar sifatida ko‘rmoqda.
“Barselona” futbolchini qo‘yib yuborishga tayyor, biroq kamida 30 million yevro miqdorida mablag‘ talab qilmoqda. “Betis” esa bu summani to‘lashga tayyor emas va narxning pasaytirilishiga umid qilmoqda.
- Mark Kasado o‘tgan mavsum La Liga doirasida 23 ta o‘yinda maydonga tushib, 1 ta gol va 3 ta golli uzatmaga mualliflik qilgan.
- Futbolchining “Barselona” klubi bilan shartnomasi 2028-yil yoziga qadar amal qiladi.
- Transfermarkt portali futbolchining qiymatini 30 million yevroga baholagan.
