Nigeriyaning Sokoto shtatida daryo bo‘yida fojia yuz berdi. Milliy favqulodda vaziyatlar agentligining ma’lum qilishicha, mahalliy bozorga yo‘l olgan 50 dan ortiq odamni olib ketayotgan qayiq 17-avgust kuni Goronyo daryosida ag‘darilib ketdi. Bu haqda BBC xabar berdi.
Rasmiylarning ma’lum qilishicha, hozirgacha faqat 4 kishi tirik holda topilgan, qolgan 40 dan ziyod yo‘lovchini qidirish ishlari davom etmoqda. Qutqaruvchilar mahalliy aholi bilan hamkorlikda qidiruvni kuchaytirgan. Nigeriyada bunday baxtsiz hodisalar tez-tez sodir bo‘ladi. Asosiy sabablar — ortiqcha yuk va yo‘lovchi olish, texnik jihatdan nosoz kemalar hamda xavfsizlik qoidalarining deyarli nazorat qilinmasligi.
Niger daryosida 2024-yilning dekabr oyida 200 dan ortiq odamni olib ketayotgan qayiq ag‘darilib, 54 jasad topilgandi. 2024-yil noyabrida ham shunga o‘xshash hodisada deyarli 200 kishi halok bo‘lgandi. Shuningdek, ikki yil avval, 2023-yilda 300 ga yaqin odam to‘y marosimidan qaytayotib, qayiqda halokatga uchragan va oqibatda 100 dan ortiq odam cho‘kib ketgan edi.
Mutaxassislarning ta’kidlashicha, qonun bo‘yicha barcha yo‘lovchilar qutqaruv jileti kiyishi shart, biroq qishloq joylarda ularning yetishmasligi baxtsiz hodisalarga sabab bo‘lmoqda. Lagos shahridagi dengiz xavfsizligi bo‘yicha mutaxassis Chidi Okeke BBC’ga bergan intervyusida shunday deydi:
“Nigeriyada kema halokatlarini kamaytirish uchun qattiq tekshiruvlarni va xavfsizlik qoidalarini joriy etish hamda cheklovlarni qat’iy nazorat qilish zarur. Shu bilan birga, mahalliy aholini xavfsizlik haqida muntazam xabardor qilib borish kerak. Filippin va Bangladesh kabi mamlakatlarda kema kapitanlari qat’iy ro‘yxatdan o‘tadi, ortiqcha yuk va yo‘lovchi olish taqiqlanadi. Nigeriyada ham shunga o‘xshash tizim joriy etilishi fojialarni sezilarli darajada kamaytirgan bo‘lar edi”.
