Braziliyalik MMA jangchisi, UFC’ning o‘rta vazn (84 kg) toifasida 6-o‘rinni egallab turgan Kayo Borralyo UFC 319 turnirida oktagonga chiqadigan Hamzat Chimayev faoliyatini yakunlashi mumkinligi haqida fikr bildirdi.
Unga ko‘ra, chechen jangchisi navbatdagi jangdan keyin aralash yakkakurashlardagi faoliyatini yakunlashi mumkin:
Ba’zilar aytishicha, agar u kamarni qo‘lga kiritsa, faoliyatini yakunlaydi. Shunga o‘xshash gaplarni eshitdim. Bu — hozircha faqat mish-mish. Ammo bu ehtimoldan holi emas. Chunki u katta bosim ostida. Salomatligi bilan bog‘liq muammolari bor. Bilishimcha, unga mamlakati tomonidan kuchli bosim bo‘lmoqda. Shuningdek, moddiy tomonlama holati ham yaxshi. Shunday ekan, nega ketmasin? — dedi Borralyo MMA Hoje nashriga bergan intervyusida.
Ma’lumot uchun, UFC 319 turniri 16-avgust kuni bo‘lib o‘tadi. Hamzat Chimayev ushbu turnirda amaldagi chempion, janubiy afrikalik Drikus dyu Plesisga qarshi oktagonga ko‘tariladi.
