“Roma” hujumchisi Paulo Dibala faoliyatini Angliyada davom ettirishi mumkin. Bu haqda Il Romanista nashri xabar bermoqda.
Manbaga ko‘ra, 31 yoshli argentinalik futbolchiga “Liverpul” klubi jiddiy qiziqish bildirmoqda. Mersisayd klubi vakillari allaqachon futbolchining agenti bilan bog‘lanib, ehtimoliy transfer shartlarini muhokama qilgan. “Liverpul” yozgi transferlar oynasida hujum chizig‘ini kuchaytirishni rejalashtirmoqda. Bunga portugaliyalik futbolchi Diogu Jotaning yaqinda avtohalokat oqibatida vafot etgani sabab bo‘lgan. Nashrga ko‘ra, Dibala ushbu pozitsiya uchun ideal nomzod sifatida ko‘rilmoqda.
Ma’lumot uchun, Dibala 2025-yil mart oyidan beri maydonga tushmagan. U Italiya A Seriyasining 29-turidagi “Kalyari”ga qarshi bahsda jarohat olib, almashtirilgan edi.
Futbolchining “Roma” bilan shartnomasi 2026-yil iyuniga qadar amal qiladi. Dibala Rim klubiga 2022-yilning yozida erkin agent sifatida qo‘shilgan.
O‘tgan mavsumda u A Seriya doirasidagi 24 ta o‘yinda ishtirok etib, 6 ta gol va 3 ta golli uzatmaga mualliflik qilgan. Transfermarkt portali Dibalaning hozirgi bozor qiymatini 8 million yevroga baholamoqda.
