Rossiya harbiy-dengiz kuchlari boshlig‘i o‘rinbosari general Mixail Gudkov Ukraina tomonidan Kursk viloyatida o‘ldirildi. Bu haqda CNN xabar berdi.
Rossiyaning Primorsk viloyati gubernatori Oleg Kojemyako Gudkovning o‘limi haqidagi bayonotda u bilan yillar davomida ijobiy munosabatda bo‘lganini aytgan. U Gudkovni “safdoshlari bilan birga ofitserlik burchini bajarish chog‘ida halok bo‘lgan mustahkam irodali jangchi” deb ta’riflagan. Kojemyako generalning o‘limi haqida boshqa hech qanday tafsilot ochiqlamagan.
Rossiya Mudofaa vazirligi 3-iyul kuni Gudkovning o‘limini tasdiqlab, u Kursk viloyatidagi jangda halok bo‘lganini bildirgan. Ukraina tomondan hozircha hech qanday izoh berilmagan. Gudkov mart oyida Rossiya prezidenti Vladimir Putin tomonidan Rossiya harbiy-dengiz kuchlari boshlig‘ining qirg‘oq va quruqlikdagi qo‘shinlar bo‘yicha o‘rinbosari etib tayinlangan edi.
Ukraina harbiylari avvalroq Gudkov va sobiq 155-brigadaning boshqa a’zolarini harbiy jinoyatlar sodir etishda, jumladan, Bucha, Irpin va Gostomel shaharlarida tinch aholining o‘limida ayblagandi.
